ferðalög og rótarý

Það er eins og ég hugsi bara um bloggið þegar ferðalög eru í vændum... mikið reyndar finnst mér frábært að fá komment, er alltaf geggjað spennt að tékka!

Allavega, búið að vera massa mikið að gera upp á síðkastið. Þar sem ég er ‘bara’ að skrifa mastersritgerðina þessa önnina hef ég tekið upp á því að bjóða mig fram í allskyns vitleysu, já og svo plana fullt af ferðalögum.

Til dæmis er ég á leiðinni í 10 daga ferðalag inní miðju þessa massíva lands á föstudaginn, tékka á uluru steininum mikla (sjá mynd) sem er stjarnan á öllum áströlsku ‘collage’ póstkortunum. Við verðum fjórar saman í campervan (sem ég man innilega ekki hvað heitir á íslensku akkúrat núna). Við munum rúnta þarna um, tékka á öllum smábæjunum þar sem íbúatalan er uþb 19 manns, en hartnær helmingur þeirra er víst lið sem hefur flutt þangað til að flýja vafasama fortíð... semsagt ef krókódílarnir, snákarnir og köngulærnar ná manni ekki, þá eru það þessir 9 og hálfu í smábæjunum sem taka rest. Allavega, ef við komumst lifandi frá þessu þá ætlum við að spæna upp til darwin og tékka þar á þjóðgarði sem þykir afar fallegur. Í október förum við Sallie vinkona svo til Melbourne í 5 daga, ferð sem hefur í dag breyst úr 3ja manna trendí borgarferðalagi í 7 manna tjaldferðalag á ströndinni, og svo í nóvember fer ég með tveimur öðrum vinkonum til Nýja-Sjálands – hlakka ekkert smá til, hefur alltaf langað til Nýja-Sjálands, hef aldrei eiginlega gefið neitt í Ástralíu, þó ég sé nú mjög ánægð með að hafa drifið mig. Langar reyndar líka til Balí, finnst ég eiginlega verða fyrst maður er nú í nágrenninu....

Er svo búin að vera frekar dugleg við að drífa mig út að djamma, hélt til dæmis mexíkanska þjóðhátíðardaginn hátíðlegan með þó nokkrum tekílaskotum og vandræðalegum salsadansi. Það verður þó að segjast að þessi borg er nú ekki uppá sitt besta eftir kl. níu á kvöldin, allt hálftómt svona - svo kíkir maður út um gluggann við sólarupprás og allir í pikknikk og á línuskautum í massastuði, ekki alveg minn hringur.

En rótarý lestin stoppar aldrei, nú erum við að plana stórt seminar sem verður eiginlega útskriftarhátíðin okkar fyrir Rótarý í lok okt. Þar eigum við að kynna rannsóknir okkar, vera með interaktíva fyrirlestra, plús almennt sprell. Af ókunnum orsökum rétti ég upp hendi fyrir allskyns undirbúning, og hef nú smellt saman dagskrá, unnið að video-undirbúningi og samið söngtexta (ef fanney, helga og ása lesa þetta einhverntímann þá fá þær kannski flassbakk) – veit ekki hvernig þetta á alltsaman eftir að fara, sérstaklega þar sem ég hef nær engum tíma eitt í rannsóknina mína en mestmegnis í almenn gamanmál... hlýtur að reddast... hér er allavega mynd af rótarýliðinu mínu, fólkið sem er alltíallt fjölskylda, vinir og samstarfsfélagar.

Ókei, læt ykkur vita hvernig fer,

Knús til ykkar allra