andvaka...

er andvaka enn og aftur, búin að liggja í rúminu í hálftíma, en enda bara á að hugsa og hugsa og ræð ekkert við endalausar hugsanaárásir, er því búin að gefast upp í bili... ég held að þetta svefnleysi sé vegna þess að ég er bara í kvöldkúrsum sem eru búnir kl. átta eða níu á kvöldin og heilinn er enn í hugsanastússi lengst fram eftir kvöldi. Í kvöld var ég td í umræðutíma hjá frábærum frönskum kalli sem talaði fjálglega um írak og kúveit og íran og bandaríkin, svo tússar hann örvar og hringi á töfluna á ljóshraða og ég bíð bara eftir að hann hoppi upp á borð til þess að undirstrika mál sitt enn frekar, hann er æði. En svæfandi er hann ekki...

kom svo heim í kvöld og átti mitt fyrsta stefnumót við ástralskt risaskordýr, ekki spyrja mig hvað það var, en það var á stærð við fuglsunga, það flaug og suðaði og lét öllum illum látum. Ég náði að halda stillingu minni (hlutfallslega), stökk inn í herbergi og er þar enn. Held ég bindi lökin saman og búi til sigútbúnað af svölunum til þess að komast út á morgun...

annars er góð stemming, mamma sendi mér kassa með fullt af frábæru dóti, kúlusúkk, bækur, séð og heyrt, föt sem komust ekki með og fleira - takk mamma! er svo byrjuð í sjálfboðavinnu við að hjálpa unglingum sem komu hingað sem flóttamenn (er orðið flóttaunglingur til?) við heimanámið - já, ekki nema von þið spyrjið, veit ég eitthvað um heimanám unglinga í ástralíu, svarið er nei, allavega stóð ég á gati í efnafræðinni, mólmassi eitthvað... endaði á að hjálpa þessum ofurdúllulega strák frá súdan með kynningu sem hann átti að halda í enskutíma, held ég hafi reyndar ruglað hann enn frekar í ríminu en hann virtist þó ansi hress með þetta alltsaman. Þetta eru allt krakkar sem hafa gengið í gegnum ótrúlegar raunir, vist í varðhaldi, ofbeldi, ástvinamissi og ég veit ekki hvað. alveg magnaðir krakkar...

allavega, held ég kaupi mér símakort til þess að geta hringt til íslands á þessum andvökunóttum, verið því viðbúin!

góða nótt!